ភ្នំពេញ៖ ត្រីបបែល ១ក្បាល ទម្ងន់ ១១០គីឡូក្រាម ត្រូវបានសង្គ្រោះ និងលែងទៅទន្លេមេគង្គវិញនាថ្ងៃទី១៤ ខែកុម្ភៈ ឆ្នាំ២០២៤។ រដ្ឋបាលជលផល បានកោតសរសើរដល់ឧកញ៉ា លឹម ស្រូយ ដែលបានសង្គ្រោះ និងលែងត្រីបបែលដ៏ធំមួយនេះឱ្យទៅរស់នៅក្នុងទឹកធម្មជាតិវិញ។

រដ្ឋបាលជលផលចាត់ទុកសកម្មភាពនេះ ជាគំរូដ៏ល្អនិងមានតម្លៃមិនអាចកាត់ថ្លៃបាន ក្នុងការរួមចំណែកថែរក្សា ការពារ និងអភិរក្សប្រភេទត្រីដែលជិតផុតពូជនេះ ឱ្យមានវត្តមានកាន់តែច្រើនក្នុងដែនទឹកធម្មជាតិសម្រាប់កូនចៅក្រោយៗទៀត។

ត្រីបបែល ជាប្រភេទត្រីទឹកសាបដ៏ធំក្នុងចំណោមប្រភេទត្រីផ្សេងទៀតនៅកម្ពុជា ដែលជាសត្វកំពុងរងគ្រោះថ្នាក់ជិតផុតពូជដោយសារតែចំនួនរបស់វាថយចុះក្នុងសតវត្សចុងក្រោយនេះ៕